பருவநிலை மாற்றத்தைத் தடுத்து பூமியைக் காப்பாற்றும் நோக்கில் பல ஆண்டுகளுக்கு முன்பு கையெழுத்தான ‘பாரிஸ் பருவநிலை ஒப்பந்தம்’ தற்போது கேள்விக்குள்ளாகியுள்ளது. ஐ.நா சுற்றுச்சூழல் திட்டத்தின் சமீபத்திய ‘உமிழ்வு இடைவெளி அறிக்கை 2026’ உலக வெப்பமயமாதலைக் கட்டுப்படுத்தும் இலக்கு நழுவி வருவதாக எச்சரித்துள்ளது.
தொழில்மயமாதலுக்கு முந்தைய கால கட்டத்துடன் ஒப்பிடுகையில் உலக வெப்பமயமாதலை 1.5 டிகிரி செல்சியஸுக்குக் கீழே கட்டுப்படுத்த வேண்டும் என்பதே 2015ஆம் ஆண்டு பாரிஸில் எட்டப்பட்ட வரலாற்றுச் சிறப்புமிக்க இலக்காகும். ஆனால், தற்போது உலக நாடுகள் அந்த வரம்பைத் தாண்டிச் சென்று கொண்டிருப்பதாக ஐ.நா எச்சரித்துள்ளது.
இந்த நூற்றாண்டின் இறுதிக்குள் வெப்பநிலையைக் குறிப்பிட்ட அளவுக்குக் கீழ் கொண்டு வர வேண்டுமானால், உலகளாவிய பசுமைக்குடில் வாயு வெளியேற்றம் 2030க்குள் 18%, 2035க்குள் 45% மற்றும் 2040க்குள் 69% குறைக்கப்பட வேண்டும் என்று அறிக்கை சுட்டிக்காட்டுகிறது. முழுமையான தேசியக் காலநிலை உறுப்புகளைச் செயல்படுத்தினாலும் கூட, உமிழ்வு 2030க்குள் வெறும் 5 முதல் 8 சதவீதம் மட்டுமே குறையும் என்று கணிக்கப்பட்டுள்ளது.
கடுமையான வெப்ப அலைகள் மற்றும் வெள்ளப்பெருக்கு போன்ற பேரிடர்களைச் சந்தித்து வரும் இந்தியாவுக்கு ஒவ்வொரு டிகிரி உயர்வும் மிக முக்கியமான ஆபத்தாகும். உலகின் மூன்றாவது பெரிய உமிழ்வு நாடாக விளங்கும் இந்தியா, தனது மக்கள்தொகையின் ஆற்றல் மற்றும் வளர்ச்சித் தேவைகளைப் பூர்த்தி செய்துகொண்டே உமிழ்வைக் குறைக்க வேண்டிய கட்டாயத்தில் உள்ளது.
2025ஆம் ஆண்டில் இந்தியா சுமார் 450 கோடி டன் பசுமைக்குடில் வாயுக்களை வெளியிட்டுள்ளது இந்தியாவின் தனிநபர் உமிழ்வு தோராயமாக 3.1 டன்களாக மட்டுமே உள்ளது; இது உலகளாவிய சராசரியான 6.4 டன்களை விட மிகவும் குறைவாகும். அமெரிக்காவில் இது 17.6 டன்கள், சீனாவில் 11.4 டன்கள்).
இந்தியா தனது வளர்ச்சிப் பாதையில் பசுமை ஆற்றலுக்கு முக்கியத்துவம் அளித்து வருகிறது. 2005 மற்றும் 2020க்கு இடையே இந்தியாவின் ஜிடிபி உமிழ்வு தீவிரம் 36% குறைக்கப்பட்டுள்ளது. பிப். 2026 நிலவரப்படி, இந்தியாவின் மொத்த மின் உற்பத்தித் திறனில் புதைபடிவமற்ற எரிசக்தி மூலங்களின் பங்கு 52.57% ஆக உயர்ந்து, ஏற்கனவே நிர்ணயிக்கப்பட்ட 50% இலக்கைத் தாண்டியுள்ளது. இந்தியாவின் காடுகள் மற்றும் மரங்களின் பரப்பளவு 229 கோடி டன் கார்பன் டை ஆக்சைடுக்கு சமமான கார்பன் மூழ்கியாகச் செயல்படுகிறது.
வரவிருக்கும் 2035 இலக்குகளின்படி, ஜிடிபி உமிழ்வு தீவிரத்தை 47% ஆகக் குறைக்கவும், புதைபடிவமற்ற ஆற்றல் திறனை 60% ஆக உயர்த்தவும் இந்தியா திட்டமிட்டுள்ளது.
1.5 டிகிரி செல்சியஸ் இலக்கை அடைவது கடினமாகிவிட்டாலும், பாரிஸ் ஒப்பந்தம் முழுமையாகத் தோல்வியடைந்துவிட்டதாக அர்த்தமல்ல என்று நிபுணர்கள் கருதுகின்றனர். இது நாடுகளுக்கு இடையே ஒரு கூட்டு இலக்கையும், அதற்கான கட்டமைப்பையும் உருவாக்கியுள்ளது.
இந்தியாவைப் பொறுத்தவரை, வளர்ந்த நாடுகள் தங்களின் நிதி மற்றும் தொழில்நுட்ப உதவிகளை உரிய முறையில் வழங்க வேண்டும் என்றும், அனைத்து நாடுகளும் தங்களின் உமிழ்வைக் குறைப்பதற்கான தீவிர நடவடிக்கைகளில் ஈடுபட வேண்டும் என்றும் வலியுறுத்தப்படுகிறது. துருக்கியில் நடைபெறவுள்ள மாநாட்டில் காலநிலை நிதிக்கான கோரிக்கைகளை இந்தியா முக்கியமாக எழுப்பும் என்று எதிர்பார்க்கப்படுகிறது.
